مقالات الرأىسلايدر

أحمد صبري شلبي يكتب .. في حب إسكندرية الماريا وعشق ترابها الزعفران

 

من الخطأ وصف الإسكندرية بعروس البحر الأبيض فهي عروس الكون كله، ومن الظلم أن يكتفي كاتب كلمات المقال بعرض وجهة نظره فقط في وصف المعشوقة السكندرية منفردا، لذا حرصت على طرح سؤال على أصدقائى الأعزاء عن سبب حبنا لتلك المدينة السحرية عبر موقع التواصل الاجتماعي الفيسبوك وهو ما زاده تشريفا بتلقي العديد من الأجوبة، وكان السؤال كالتالي.

بتحبو إسكندرية ليه ؟

وائل عشماوي… فيها حاجة حلوة.

رمضان أبو سلامة… إسكندرية بلد كل المستويات أو مصيف كل المستويات متحسش بالفرق غير بقي إنها تتحب من غير حاجه أنا كنت بحب المنتزه والمنشية ومحلات المنشية.

عزة عبد الجليل… إسكندرية فيها روح جميله و بحرها فيه كل الأسرار.

علي الحسيني… إسكندرية بلد روحها حلوه مريحة نفسيا حتى لو قاعد ع البحر لم بتتمشي في أي مكان بتحس براحه نفسيه إسكندرية لمه كل فئات المجتمع، إسكندرية عروس البحر وهيا فعلا عروس البحر بلد مش بتنام.

دعاء محمد… عشان مدينتي وعشقي وماعرفش أطلع منها.

محمود صيام… عشان نص جمال القاهرة في إسكندرية.

أشرف مصطفى… حب إسكندرية ملوش سبب، حاجة كدة بالفطرة.

أسامة فتحي العباسي… إسكندرية ناسها أصيلة، بلد جميلة، تنزل فيها تتفسح وتلقى وسط أهلها مطرح، تفارقها تتعب تتأثر، تعود لها ترجع تفرح.

رامي عبد الحميد… من عشاق إسكندرية في الشتاء والوقف في الأمطار أمام البحر مع أكل الآيس كريم وطبعا ماينفعش ننسى السمك.

نهال مجدي… روحها والطاقة الإيجابية..جوها مليان فرح وسعادة..تاريخها وشقاوتها وريحتها..ذكرياتنا فيها..بساطتها وشموخها..كوكتيل حاجات ومشاعر متتوصفش..بحبها وبس.

محمد حنيش… بحبها وأنا مش عارف ليه… بس بحسن إني مطمن لما بروح هناك.

أسامة مجدي… شكلها في الشتا.

عبد السلام الدمراني… إسكندرية في الشتا بتفكرك بأوروبا فهي ماريا.

صبري محي… من غير ليه.

أحمد قمر… لالتقاط الصور الشخصية بالمنتزه.

نهاد المرسي… ايوووووه الإسكندرية معشوقتي، عروسه البحر الأبيض المتوسط، الشمس الجريئة والنسمة الرقيقة والضحكة البريئة، نحبو بحرها وهواها وشوارعها وحارتها، نحبو بساطتها وشياكتها، نحبو السيالة والأنفوشي والحلقة والقلعة ومنشيتها ومعمورتها ومنتزهها، نحبو كل تفاصيلها وتورمايتها، نحبوا شتاها الدافي بحب حبايبها، نحبوا التمشية علي كورنيشها، أحلي أكله سمك تاكلها في إسكندرية أحلى جيلاتي تاكله ف إسكندرية أحلى رز بلبن تاكله في إسكندرية كل حاجه حلووووه في إسكندرية، إسكندرية ماريا وترابها زعفران… واه من العشق ياني.

مصطفى زيدان… إسكندرية يعني دفء الشتا وتراوة الصيف، يعني تين شوكي علي البحر بالليل، يعني الدنيا تشتي وتروح مبلول، إسكندرية يعني لمه العيلة ساعة الغدا علي رمله البحر تحت الشمسية، يعني العيلة كلها في الشتا تحت البطانية ادام التلفزيون، إسكندرية يعني الروح الحلوة والدم الخفيف، يعني أي وقت مخنوق هتنزل تتمشي علي البحر… إسكندرية العشق.

كريم موافي… إسكندرية مش مصيف بس دى فسحة وتمشية وتسوق وتاريخ وحاجات حلوة كتير.. فيها قلعة قايتباي التي بنيت في عهد السلطان الأشرف أبو النصر قايتباي عام 882 هجريا في أقصى الغرب السكندري بجزيرة فاروس وهو المكان القديم لفنار الإسكندرية أحد عجائب الدنيا السبعة والذي تهدمت بفعل زلزال 702 هجريا في عهد السلطان الناصر محمد بن قلاوون.

حسام رمضان... علشان إسكندراني.

أميرة محمد... روحتها مرتين بس في حياتي، بس وقعت ف حبها من أول نظرة.

عبير الحسيني… ليها روح مختلفة، بتخلي النفسية أهدى.

عمرو عبد الله… إسكندرية مدينتي عشق لا ينتهي، والسمكة لو طلعت من المية تموت.

مهيد هاشم… أحلى شيشة في الكون مع الشاي بلبن.

محمد عبد البصير… إسكندرية حاله من الروقان الطبيعي، إحساس بالرحابة وذكريات جميله وشجون وأفراح وأحاديث البحر التي لا تنتهي، ومذاق الفرحة المختلفة.

دعاء قدري… مسقط رأسي وأجمل أيام الطفولة.

سامح المحمدي… فيها روح مش موجودة في أي مكان وريحه اليود مابشمهاش غير هناك، حسني بتاع بحري ومشويات بلبع في سيدي بشر ليهم مذاق خاص وترماى باكوس ومحطة الرمل ومكسيم المعمورة أيام الشقاوة ما تتنسيش، وجيلاتى عزه والشيخ وفيق، من الآخر كده إسكندرية الرومانسية كلها، والعشق الأبدي.

نهاد المرسي… واقرو الفاتحه لابو العباس الاسكندرانيه دول اجدع ناس.

أبو عبود… استوحى أغنية جارة القمر فيروز شط إسكندرية يا شط الهوى، رُحنا إسكندرية رمانا الهوى، يا دنيا هنيّة وليالي رضيّة، أحملها بعينيّ شط إسكندرية ، شط اسكندرية يا شط الهوى.

عابد سلامة… حاجه ذي متكون سألتني إتولدت مسلم ليه،أنا إتولدت لقيت حبها ف قلبي مع إني نزلتها 5مرات لكن عشقها دوب قلوب كل اللى زارها قبل ما يدوب قلوب أهلها.

سامح عبد الله… بلدي معشوقتي.

كرم حرب… أنا عمري ما زورت إسكندرية للأسف بس حقيقي أول ما الواحد بيسمع سيرتها بيشم ريحتها الطيبة الجميلة، وحقيقي من أجمل المحافظات.

محمود أحمد… إسكندرية البنوته، إسكندرية بالنسبه ليا البنوته حبيبتي اللي هتفضل طول عمرها بنت 17، بشوف ضحكتها بشوف شقوتها بشوف خفه دمها،لما بكون زعلان من غير ما اشكيلها تعرف و مش تسيبني غير و انا مبسوط و فرحان، رشه مية من البحر علي وشك وانت ماشي ع الكورنيش كفيله تنسيك أي حاجه كأنها بتحضنك و بتلعب جنبك و تلاعبك، الشياكة شياكة هانم من هوانم الخمسينات، شياكة باينه في كل مباني محطة الرمل والفراعنة و شارع فؤاد و السلطان حسين، ناسها مختلفة جو البحر وجماله مأثر فيهم معظمهم زي البحر في حكمته و هدوئه و اتساعه للكل (باختصار كل حاجه فيها تتحب).

عبد الرحمن شاهين… إسكندرية حالة خاصة، بتعيشك جو أوروبا والتاريخ، طلاينة علي يونان علي مصري قديم أيام الجدعان وحكايات زي زيزينيا كده، وكل مكان فيها له حدوتة حلوة، ده غير شعبها المرح والعشريين.

فاطمة معاذ… روحتها 3مرات وف كل مره بتاخد حته منى اخر مره خدت روحى منى والله.

خالد جمال… إسكندرية عروسه البحر الأبيض المتوسط، شارع خالد ابن الوليد، محطة الرمل، بصراحة كل حاجه حلوة، كفاية هواء الكورنيش في الليل، والأهم أن المدير من هناك.

طارق أبو كرم… إسكندرية بموقعها المميز اللي اختاره اسكندر الأكبر بذكاء قدرت تكون لها شخصية حضارية عبر العصور .

أولا: بطريقة بنائها الأساسية التي تشبه أرضية لعبة الشطرنج بشوارع متقاطعة وعمودية علي بعض وده عمل تلاحم وترابط بين سكانها لان نقط التقاطع (الالتقاء) كثيرة في كل حي سكني.

ثانيا: إسكندرية كان ليها إرث تاريخي كبير ثقافيا بسبب مكتبة الإسكندرية القديمة والإرث ده امتد عبر العصور عشان كده بتلاقي أصول كثيرة للسكندريين الحاليين من سواحل البحر المتوسط الشمالية الشرقية زي اليونان وإيطاليا ومن سواحل المغرب العربي ومن بلاد الشام الساحلية كلهم كان في الأصل هدفهم البحث عن العلوم والثقافة والدليل علي ذلك مجموعة كبيرة من رجال الشرائع السماوية الثلاث اليهودية والمسيحية والإسلامية بمختلف عصورهم أتوا إلى الإسكندرية وخلدت ذكراهم بأسماء المعابد اليهودية (معبد إلياهو هامبي) وأسماء الكنائس المسيحية (الكنيسة المرقصية وغيرها) والمساجد والأضرحة الإسلامية زي أبو العباس المرسي وسيدي جابر وسيدي بشر والعجمي وغيرهم .

ثالثا: بحكم موقعها كميناء كبير قدرت إسكندرية إنها تمزج كل اللي عاشوا فيها مهما كانت جنسياتهم أو ديانتهم بالحب والتعايش السلمي وتقبل الآخر وتعود أهلها أن يتعاملوا مع جنسيات متعددة مما زاد من آفاق مداركهم للحضارات المختلفة وتقبلها بل وتبادل العادات معهم في الأعياد والمناسبات .

رابعا: استطاع السكندري الأصلي وبذكاء أن يطبع المهاجرين من داخل وخارج مصر بطباعه وعاداته ولهجته المميزة لدرجة جعلت الكثير منهم يخفي الأصول ويتعمد أن يظهر سكندريته المكتسبة من معاشرة السكندريين.

خامسا: سحر الإسكندرية كمدينة جميلة ومنسقة ونظيفة جذبت العديد من الفنانين والشعراء وكانت مصدر للالهام والتأمل والتفنن فتغني بها كبار المغنيين وكتب عنها كبار الكتاب وتفلسف فيها كبار الفلاسفة.

سادسا: قصص الحب والغرام التي بدأت بكليوباترا وانطونيو وامتدت حتى اليوم بالتقاء أهل مصر علي شواطئها ورمالها صيفا يتبادلون التعارف وتنشأ قصص الحب في الجو الرومانسي البحري الذي يخطف القلوب ويجمعها برباط الحب .

سكندري عاشق والعاشق لا يمل من الحديث عن معشوقته ..

حسين البهي وأحمد نديم… ذكريات جميلة لا يصح كتابتها بالمقال، لكنها تظل ذكريات جميلة داخل الوجدان.

عبد العظيم محمد... الإسكندرية (لا أراك دنيا ولكن أراك دنيا كل ما فيها جميل).

مها البنا… ذكريات الطفولة ريحتها عمرك ما تنساها مع إن مرسى مطروح اهدي ودلوقتي طالع العالمين وجبل الجلالة لكن هي فيها سر.

محمد الصباح… مش عارف بحب إسكندرية ليه، بس عندي تساؤل وجودي…. ليه معندناش غير إسكندرية واحدة ؟!!، مصر عندها 2000 كيلومتر من السواحل. مش أجمل بحر فيهم بحر إسكندرية. ومع ذلك مفيش بلد علي كل السواحل الفاتنة دي ليها سحر وجمال الإسكندرية. وده شيء غريب. ربما كان ده سحرها…. انها فريدة!

ياسين عادل محروس… إسكندرية حلوة جدا ببحرها وسمائها وثقافتها وتاريخها وملقبة بعروس البحر الأبيض المتوسط هي كانت قرية راقودة، والإسكندر الأكبر جاى بناها في 333 ق.م عمل مبانيها على هيئة الحضارة الهيلينستية شبه أثينا وكم معبد بالتراث المصري، وبيقولوا أن مقبرته في الإسكندرية لكن مكانها غير معروف وفيها أشهر مكتباتها هي مكتبة الإسكندرية وفنار الإسكندرية القديم في فاروس الآن هي قلعة قايتباي إتبنت بطوب الفنار القديم والمعسكر الروماني ومتحف الآثار الغارقة بالإسكندرية ومن ضمن المتحف قصر كليوباترا السابعة التي كانت في جزيرة غرقت إسمها أنتيرودس والمتحف اليوناني الروماني والمسرح الروماني وعمود السواري ومقبرة الجندي المجهول بالمنشية وأجمل المساجد والكنائس والمعبد اليهودي.

هي متعددة الثقافات وكان أبرز الجاليات تحب الإسكندرية هي اليونانية والإيطالية والمالطية وهناك من المتاحف والقصور فيها أيضا مثل قصر رأس التين وقصر المنتزه وقصر أنطونيادس ومتحف المجوهرات الملكية ومن أكلات الإسكندرية المفضلة هي المأكولات البحرية وهناك من الأحياء في الإسكندرية أحياء غنية وأحياء متوسطة.

إيمى السمان… إسكندرية الروح.

مروة نصرت… المدينة البيضاء.

محمد سيد… إسكندرية العشق بتحس كده براحه نفسيه بمجرد ما توصل سواء لجوها التحفه شتا و صيف أو لنظافتها و كمان التاريخ اللي موجود في مزاراتها.

أحمد فؤاد… أكيد علشان أنا فيها.

نهاد المرسي… مينفعش نجيبو سير إسكندرية ومنفتكرش القمرتين رايا وسكينه

وليد سعد… الروح تعشق الإسكندرية، انت بس توصلها وتشم هواها ومودك بيتحول 360 درجة بدون سبب.

محمد بسيوني… مدينة تاريخية ، تشم ريحة التقاء الحضارات فيها ، بس أفضل زياراتها في الشتاء.

فاطمة سعودي… أنا بحب ريحة الهوا علشان مبلول (كلمة وصفها طفل في الصف الأول الابتدائي حينها.. كلمة للأستاذ عمرو يوسف الحاصل حديثا على بكالريوس تجارة نجل السيدة فاطمة سعودي وفقه الله) جمع المية والهوا مع بعض، إسكندرية ماريا.

مريم محمد علي… محدش ملهوش ذكرى حلوة في إسكندرية و بذات المعمورة، وفعلا معمورة بكل تفاصيلها، مصيف بيحب اللمة وميحلاش غير بالعيلة و الصحاب، كفاية أصلا ريحة بحرها اللي من غير مبالغة في التعبير تشمه من علي بعد، وتأجير العجل بليل و الجري به علي ممشي المعمورة، اه ممشي المعمورة ده بقي حكاية تانية بقي، الآيس كريم و الزلابيا السخنة، سوق إسكندرية و طعمية إسكندرية و المعارض بتاعة بليل و الملاهي و السمك، كل ده حاجات حصلت و أنا عندي سنتين ل خمسة طول الأربع سنين مكناش بنروح غيرها يعني كنت طفلة أوي بس فاكرة كل حاجة بالتفاصيل، ووقت الغروب ده بقي كان متعة المتعة و أنت شايف الشمس بتغرب قدامك حاجة روعة، ولا المنتزه والعصافرة و حلاوتهم و لما كبرت شوية و بقي عندي ١٤ سنة يعني من سنة ونص بظبط شوفتها و هي في الشتاء عالم تاني خالص، لطشة الهواء الساقعة مع البحر، الريحة مالحه قالبه الدنيا تخليك مش عايزة تروح، كانت رحلة مع المدرسة و حرفيا كانوا بيجمعونا بالعافية و حقيقي بحقد علي كل أهل إسكندرية إنهم بيقوموا كل يوم الصبح علي الحلاوة و الجمال ده، وإسكندرية مبتقولش لحد لاء، غني هتروح و هتتبسط فقير هتروح وهتتبسط.، اه مصر جمالها ميتعدش و كل حته لها جمالها، بس إسكندرية عالم تاني خالص كفاية إنها حفرت طفولتنا علي رمالها و كل تفصيله حلوة فيها. ومحدش ينسي العوامة البطة أكيد كلنا ركبناها.

محمد سامي… إسكندرية عاملة زي حب ابتدائي كده .. حاجة ملهاش سبب معين خصوصا في الشتا.

محمد عبد الجواد… الراحة النفسية في اسكندرية.

طلعت عامر القويضي.. إسكندرية علي بعضها كلها جميلة لها طعم تاني ليس لها شبيه.

أحمد نيل… أنا لفيت مصر كلها محافظة محافظة، ومعظم الأماكن في مصر المحروسة كلها كان ليا الشرف انى زورتها، مفيش مكان عزيز على قلبي زى إسكندرية بهواها المندى اللى اول ما اوصل هناك بعرف إن يومي ده من الأيام السعيدة وبنبسط بيه جدا، بحب إسكندرية ماريا الجميلة.

شمس الحياة… إسكندرية بلاقى نفسي فيها، بحب ريحة الهوا ونسمته الرقيقه، وزحمتها وأماكن كتير ذكرياتها ماتروحش مع الزمن.

محمد زبيب… إسكندرية بالنسبالى يعنى العشق والروح .. لدرجة اننا كأسرة تركنا محافظتنا بالغربية ونقلنا حياتنا كلها فيها.

سمير الغلبان… لأنها مصرية.

جندية مصرية… السؤال عمره ما يكون كده، ممكن نقول : مين اللي مايحبش اسكندرية ؟ وساعتها مش هتلاقى حد يجاوب ويقول انا.

نجوى صبري… يا جمالها بالشتاء، بتلمع، جو صافى بديع مشبع باليود ..ساحره كأنها أوروبا.

سامح أحمد… بين شطين وميه عشقتهم عنيا يا غالين عليا يا أهل إسكندرية.

إنجى فؤاد… من غير ليه، طب والله من غير ليه كل شبر فيها يتحب من غير ليه.

هدى الحداد… بعشق بير مسعود بالليل وقت اكتمال القمر.

شادي رضا عامر... مهما الواحد يلف ويسافر الساحل وشرم والغردقه وأي مصيف، تبقي إسكندرية طعم تاني مختلف،طعم أصيل زي أكل جدتي مش هيتكرر تاني ولا له بديل.

أحمد بندق… إسكندرية يعني الطفولة والشباب، يعني لمه الأصحاب والسهر على البحر لغايه الصبح، يعنى منظر الغروب وانت قاعد تحت الشمسيه مستنى لما الشمس تغيب، يعنى لمتك وسط أبوك وأمك اللى فارقوا الحياة، إسكندرية دى العشق بجد كل الذكريات الحلوة.

تامر أحمد… رباني كده احلي ذكريات جميلة جدا جدا جدا و احمد ابني اتولد فيها و علي بلد المحبوب وديني وأخيرا منها سيد درويش.

خديجة خطاب… هي جزء من حياتي.

طارق خميس شعراوي… شهادتي مجروحة لأني مواليد إسكندرية، الإسكندرانى لما بيطلع منها بيبقى زى السمك اللى بيطلع من الميه، (وبيطلع معناها بيخرج) مسائكم معطر بهواء إسكندرية.

سلوى رحومة… إسكندريه عشق، كلها على بعضها حبيبتي، شيك في نفسها كدا، بنت ناس أوى، جمييييييييله في كل وقت، مدينتي وافتخر.

هالة فؤاد سليمان… إسكندرية ماريا وترابها زعفران.

هبة الله جودة الدفراوى… المنشية والرمل بتفكرنى بأيام زمان وجمالها، شوارعها وجمال المعمار القديم والحارات الضيقة المحتفظة بشكلها القديم إلى بتحس فيها إنك لسه صغير.

أحمد سلامة… فيه حاجات ماتعرفش تسأل نفسك بتحبها ليه.

أمل زكريا… إسكندرانية، إسكندرية ماريا وترابها زعفران.

إسلام نصر طه… بلد رقيقة.

سلامة أبو طالب… اسكندرية احسن ناس، عالبحر ماشية تتمختر، من سيدى بشر لأبو العباس، أيوة يا عالم عالمنظر، إسكندرية الفرعونية والرومانية اليونانية والإغريقية والمملوكية .. البطالمة والفتح الإسلامي تاريخ من أبو قير والحملات الانجليزية والفرنسية ..أبية علي الطغاة، احكي لي عن المسرح الروماني .. مكتبة الإسكندرية ..الفنار ..قلعة قايتباي، الهريسة ولا الفلافل .. ايوووووه.

فاطمة عبد العزيز... إسكندرية بالنسبة العشق والروح، إسمها بس كفييل يسحب روحى وكنت بتمنى طول عمرى لو حتى اوضه بصالة بس اعيش فيها.

أماني العطار.. ذكريات بطريقة فوق الوصف.

نوران محمد… مدينتي وبلدي اللي اتولدت واتربيت وعيشت فيها عمري كله، أحلى بلد ف الدنيا كلها، إسكندرية وجمالها.

يوسف صابر… أنا بحب إسكندرية.

هيثم عبد الفتاح… الدنيا كلها عملت مواويل وأغاني في حب إسكندرية، إسكندرية يعنى الشتاء والبرد بس الدافي، إسكندرية يعنى بحري والانفوشي ،،،،،،، إسكندرية عشق.

إيهاب مكرم... إسكندرية بالنسبه لى أحلى ذكريات شبابي، أول حب، وفيها دوقت وعرفت معنى الحياة والسعادة والبهجة والمرح

لسه فاكر شوارعها وبحرها وهواها الجميل، كل الحب والتقدير لأهل إسكندرية العزاز على قلبي.

حسام الديب… حاجه كده أول ما تهل من بعيد وتشم ريحة البحر بترجع سنيييين لورا وتفتكر حاجات تخلي عينيك واسعة وقلبك بيدق وتحس إنك عايز تطير….. كمان ليا فيها ذكريات حب حلوه قوووي متتنسيش… كل حاجه في اسكندريه حلوه قوووي.

محمد أبو ذكري… إسكندرية العشق، قاعدة البحر، ريحة البحر وموجه، تمشى على البحر في عز الشتا وانت ايدك فى جيب الجاكيت، أنا ممكن أتكلم سنييين عن حبى وعشقى لإسكندرية.

محمد خميس السمان… إسكندرية مش مجرد مدنية، إسكندرية حياة.

محمد محمود عتمان… أغلى مكان لقلبي.

مصطفى المصري… نظيفة وخصوصاً قبل الازدحام، والبحر مأثر علي أخلاق وأعصاب الناس.

وليد حلمي… مافيش كلام يقدر يعبر عن حب إسكندرية.

اقرأ أيضًا 

إعفاء ذوي الإعاقة من تراخيص المباني والضرائب والرسوم

نوادي القوات المسلحة تعفي ذوي الاحتياجات الخاصة من رسوم الدخول (مستند)

 

مقالات ذات صلة

تعليق واحد

ما تعليقك على هذا الموضوع ؟ ضعه هنا

زر الذهاب إلى الأعلى